التااالتة تااابتة !!

مش معقول الكسل اللي انا فيه ده ، زمااان كنت بروح البيت بعد المدرسة ، يادوب اغير هدومي ، و اقعد احل الواجب، على طول ، ما افتكرش اني اتأخرت في عمل الواجب و لا كشكولي ماكنش جاهز يوماتي ..
و في الكلية استمر الحال على ماهو عليه ، و لما اتجوزت ، طلبات جوزي اوامر ، و سيف على رقبتي ، لغاية اما خلفت ، اتخلفت ..
معرفش ايه اللي حصللي ، بقت كل حاجة بإذنك يا رب ، و يااا مسهل ، و ربنا خد مني كل حاجه و اداني الشحة ( الصحة ) :))

المهم اللي فكرني بالمقدمة الطويلة دي كانت ضي القمر صاحبة مدونة حروف متناثرة و تحديدا يوم 26 /8 لما بعتتلي اول تاج في حياتي ، و بصراحة كده و من الاخر اللي خللاني اكسل في الاجابة لانني استصعبت السؤال ، قولت البنت دي مني و عليا ،و مش هتعلقلي المشنقة لو اتأخرت في الاجابة ، بس بعد شوية لاقيت شيماء مهدي صاحبة مدونة حنين و احمد ، باعتالي واحد تاني .
قولت اتلم بأه و اقعد و اركز و اجاوب على السؤالات ..
بس طبعا رمضان جه و ايامه واحده و را التانية ، توهت ، و فوقت النهارده على تاج تالت من حبيبتي محاسن صابر صاحبة مدونة عايزة اتطلق و ، قولت خلااااص التالتة تابتة ، و الله لانا قاعدة و اجاوب على السؤالات و اسيب الغسيل يعني هو هيروح فين ..

فقبل كل شيئ بطلب السماح من ضي القمر و شيماء مهدي على التأخير ..

و نبدأ باسم الله ..

اولا : تاج ضي القمر ..
-- اذكر 6 أسرار قد لا يكتشفها من يقابلك أول مرة ؟
للاسف انا عاملة زي الكتاب المفتوح ، و حروفه سهلة القراءة ، معنديش اسرار يكتشفها من يقابلني اول مرة ، غير اني طيبة و عبيطة و بصدق كل اللي بيتقاللي زي مادايما بيقولولي ..
بحب ربنا اوي ..
بس بتخنق اوي لما حد يتجاب في سيرته و ما اقدرش ارد غيبته ، لاني بخاف ازعل اللي قدامي او المح له انه غلطان ..

***************

ثانياً : تاج شيماء مهدي ..
التاج ده كان حكاية ، اتنين في واحد ، موضوعين منفصلين و تدبيسة واحده :))

الدبوس الاول :
1 .. بدأت تدون من امتي ؟ و دخلت العالم ده ازاي ؟
دخلت عالم التدوين في نص شهر اغسطس اللي فات ، الموضوع جه معايا من غير حساب ، يعني بكتب افكاري و خواطري و هواجسي – غريبة هواجسي دي :))- و بعدين حبايبي شاروا عليا اني اعمل مدونة وكده، فقلت ليه لأ ..

2 .. ايه كان انطباعك في البداية ؟
تجربة جديدة عليا تماما ، يعني حته ان حد يقرأ اللي بكتبه ده بالنسبة ليا زي اللي بيتفرج على كل كياني و اسراري .و بعدين بهرني اوي الناس اللي بتتكلم في كل حاجة و اي حاجة و بتعبيرات في منتهى خفة الدم ..
3 .. مين أكتر واحد بتهتم بتعليقه علي بوستك الجديد ؟
جوزي طبعا ، لازم اخد منه ختم "مصرح للنشر " :) ، بقتنع برأيه جدا ، و عشان كده بيشوف كل بوستاتي قبل ما حتى انشرها ، اما بالنسبة للتعليقات اللي بتجيني على المدونة كل الناس بهتم بيهم ، لانهم كلهم اصحابي و حبايبي ..
4 ..مين اتعرفت عليه من خلال المدونة و نفسك تتعرف عليه في الحقيقة ؟
اللي نفسي اتعرف عليهم من المدونين كتير اوي سواء من الجنسين ، بس الاكتر الاكتر اوي يعني :) حبيبتي محاسن صابر صاحبة مدونة عاوزة اتطلق و ،وامي الجميلة ماما امولة صاحبة مدونة الزمن الجميل ،و الرقيقة شيماء مهدي صاحبة مدونة حنين و احمد.
5 ..ايه أهم حاجة اتعلمتها من عالم التدوين ؟
لازم كل حاجه تكتب بصدق ، مش مهم اللغة تكون صح اوي ، المهم انها تكون من القلب عشان توصل ..
6 ..ايه أكتر حاجة كرهتها ؟
التعليقات ذات الملامح المبرحة و الالفاظ الخارجة ، و ايلام الغير بمجرد حروف مكتوبه .
7 ..ممكن تدي مثال عن اللي بتحلم تلاقيه ؟
لو في مجال التدوين .. نفسي يكون للمدونين كلمة في البلد ، بس كلمة بجد ، يعني ممكن يعملوا حاجة كده زي نقابة ، و يكون من اعمالها المشاريع الخيرية و التغير في البلد ، و مساعدة المدونين الافذاذ في نشر مدوناتهم و تعريفهم على العالم الخارجي بره حدود مصر، و انا شوفت نواة ده في الخير اللي بيعملوه المدونين المصريين ..
8 .. حاسس ان التدوين له تأثير ؟
طبعا ، كفاية على اقل تقدير ، انه بيخرج الواحد من عالمه المغلق عليه لعالم تاني و ثقافات اشخاص اخرين ، و افكار ، التدوين ده دنيا تانية ..
9 .. طيب كلمة أخيرة ؟
بشكر غاليتي ضي القمر و كل اللي وقفوا معايا و شجعوني على التدوين اصلا من البداية ، و اول ناس علقت ليا في اول بوستاتي ، لاني كنت مستغربة الموضوع في الاول ، و كلامهم ثبتني ..

الدبوس التاني :
1 .. أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟
- كان نفسي اكون طبيبة ، بس ده اتغير لما دخلت كلية الهندسة و حبيت كليتي و دراستي فعلا ..
- كان نفسي اختلط بالدنيا من زمان ، و احتك بيها و اتودك زي ما بيقولوا ، و اتثقف و اقرأ و يكون ليا نشاط اجتماعي، بس انا مؤمنة جدا بان كل شيء بأوان ، و لما ربنا قدرلي اني اخرج للدنيا و احتك بالناس حولي، كنت تماما في الحال اللي اتجاوب مع الدنيا و مش اتصبغ بألوانها .

2 ..أذكر 5 أحلام على الأقل تخص مستقبلك ؟
- نفسي اخلف كتير، و اساهم في الازمة السكانية في مصر :) ، بس كله بأمر الله ..
- نفسي اروح الريف الايطالي ، و اسافر اتعلم الطبخ هناك ، و اعمل كده زي الشيف "تايلر" – شيف بس من الاخر كنت بتابع حلقاته على قناة فتافيت بتاعت الطبيخ – بس هسيب جوزي و ابني و اروح فين ، اديني قاعدة ..
- نفسي اربي ابني زي ما حماتي ربت جوزي ، و احبه زي ما هيه بتحب جوزي – ربنا يخلليهالنا و يبارك فيها و يطول لنا في عمرها و يمتعها بصحتها ... آمين
- نفسي اقرب من ربنا اوي ، واعرف انه راضي عني سبحانه .
- نفسي ربي ينعم علي بنعمة حفظ كتابه ..

3 .. أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟
- صديقي و حبيبي و زوجي الغالي.
- "نانو" اختي الصغيرة ، و برضة كانت تفضل صغيرة عشان احس دايما انها بنتي اللي مخلفتهاش.

4 ..أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟
ابني الكبير و اول فرحتي عبد الرحمن – الله يرحمه و يجمعني به يوم الدين – بس هذا قضاء الله ورحمته ، انا عارفه انه تعب كتير و شاف في مرضه الكتير – مات و عمره اربع سنوات من سرطان في المخ في شهر ابريل 2008 – و انا بس زعلانه على الفراق و حضني اللي خلي منه ومش اكتر..

لمن تهدي هذا التاج ؟
اهدي التاج لناس كتييير اوي ..
ابي الفاضل ابو خالد صاحب مدونة ذكريات ابو خالد
امي الجميلة ماما امولة صاحبة مدونة الزمن الجميل
اختي الفاضلة موناليزا صاحبة مدونة امة الله
اختي الغالية فاتيما صاحبة مدونة روح قلب ماما
خالو احمد الصباغ
اخي الفاضل محمود العدل صاحب مدونة عالم محمود العدل
اخي المجنون صاحب مدونة المجنون
سوووو صاحب مدونة عجوووز و عندي 30 سنة


***************

بما اني خلصت الواجب قولت اقوللكم شوية من اخر اخباري ..

ياسادة يا كرام الحمد لله روحت بفضل الله عملت عمرة ، الموضوع بالظبط اخد مني 20 ساعة ، طيران من الرياض لجده ، و بعدين نزلنا مكة اعتمرنا- الحمد لله - و بعدين روحنا على طول ، ربنا يتقبل منى و من الجميع ، و دعيت للكل ربنا يستجيب مني ، ربنا ينولها لاللي نفسه يزور بيته الكريم .
عشان كده اتأخرت في ردي على بعض تعليقات البوست اللي فات ..


الخبر التاني ..
انشاء الله ، هعيد في مصر :) هيييييييييييه .
هنزل مصر على يوم 25 رمضان ، و اللي عاوز حاجة من هنا عنيا الجوز ، حبيايبي و اخواتي ..

كل سنة و انتو طيبين و ربنا يتقبل منكو رمضان و عملكم الصالح فيه ، و يبلغكم العيد و تكونوا من الفايزين فيه برضا الله سبحانه و تعالى ..