فما بعد ذلك !!!

هكذا انقضت تلك الليالي المباركة، ومرت كالاطياف ، عن قريب اذكر انني تمنيت شهرا كريما لاصدقائي و احبائي عبر مدونتي،،،
و مرت عجلة الزمن بسرعة ، فهذه هي سنه الحياة مع الاوقات الجميلة ، و الضيف العزيز ،،،

اعزائي ..
لو تفحصنا حال الناس في رمضان ، الكل متسامح ، فالانسان يغفر الهفوات و السقطات لاخيه الانسان، سيل من الخيرات يغدق به كل كريم على نفسه و على من حوله .
حسنات حسنات حسنات..
شهر الكرم مسماه ، و الطيب و الجود فحواه ، و رضا الله مسعاه ...

فلما لا يكون كل ايامنا رمضان ، كلنا نراقب الله ، نطلب وده ،نتمنى رضاه ، تأبى جوارحنا ان تعصي الله ، نفوسنا ذاهبه اليه ؟؟!!!
هل لسلسلة الشياطين سبيل في ذلك ؟!!
ام لجام مراقبة الله و الخوف منه هو من يلجم انفسنا عن فعل المعاصي !!..
ما السر في وجود السكينة بين الارواح ؟!!!
ما السر وراء البسمة التي تطل من شفاة كل صائم ؟!!
ما السر في سريان الطمأنينة بالقلوب ؟!!
ما السر في استشعار قرب الله تعالى منك ومنى ؟!!
ما السر في كل ذلك الخير بهذا الشهر ؟!!

يقول الله تعالى ..
وَلَوْ أَنَّ أَهْلَ الْقُرَى آمَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالأرْضِ وَلَكِنْ كَذَّبُوا فَأَخَذْنَاهُمْ بِمَا كَانُوا يَكْسِبُونَ ( الاعراف الاية 96 )

استوقفتني تلك الاية كثيرا ، فبها قد املك الدنيا و الاخرة، بها أقتني مفاتيح رزقي و سعادتي في الدارين بإذن الله تعالى ، قد كان تدريب عملي على مراقبة الله وتقواه استمر ثلاثون يوما ، و اثاره تمتد لما بعد ذلك ، تدريب يجتازه الكل موفقا مثابا فرحا باذن الله ، فرحا بصومه و عمله المقبول . تلك البركات التي تعم الرجل و المرأة و الطفل ، الفقير قبل الغني ، الكبير و الصغير ، ، الصحيح و العليل ، كل مسلم شهد ذلك الشهر و صامه ايمانا و احتسابا لله تعالى ..

احبائي اخوتي في الله..
كل عام و انتم بخير ، و ادام الله ايامكم سعيده برضوانه تعالى ، و فرّحكم يوم عيدكم بقبول صومكم، و سعيكم لنول عفو الله ..

التااالتة تااابتة !!

مش معقول الكسل اللي انا فيه ده ، زمااان كنت بروح البيت بعد المدرسة ، يادوب اغير هدومي ، و اقعد احل الواجب، على طول ، ما افتكرش اني اتأخرت في عمل الواجب و لا كشكولي ماكنش جاهز يوماتي ..
و في الكلية استمر الحال على ماهو عليه ، و لما اتجوزت ، طلبات جوزي اوامر ، و سيف على رقبتي ، لغاية اما خلفت ، اتخلفت ..
معرفش ايه اللي حصللي ، بقت كل حاجة بإذنك يا رب ، و يااا مسهل ، و ربنا خد مني كل حاجه و اداني الشحة ( الصحة ) :))

المهم اللي فكرني بالمقدمة الطويلة دي كانت ضي القمر صاحبة مدونة حروف متناثرة و تحديدا يوم 26 /8 لما بعتتلي اول تاج في حياتي ، و بصراحة كده و من الاخر اللي خللاني اكسل في الاجابة لانني استصعبت السؤال ، قولت البنت دي مني و عليا ،و مش هتعلقلي المشنقة لو اتأخرت في الاجابة ، بس بعد شوية لاقيت شيماء مهدي صاحبة مدونة حنين و احمد ، باعتالي واحد تاني .
قولت اتلم بأه و اقعد و اركز و اجاوب على السؤالات ..
بس طبعا رمضان جه و ايامه واحده و را التانية ، توهت ، و فوقت النهارده على تاج تالت من حبيبتي محاسن صابر صاحبة مدونة عايزة اتطلق و ، قولت خلااااص التالتة تابتة ، و الله لانا قاعدة و اجاوب على السؤالات و اسيب الغسيل يعني هو هيروح فين ..

فقبل كل شيئ بطلب السماح من ضي القمر و شيماء مهدي على التأخير ..

و نبدأ باسم الله ..

اولا : تاج ضي القمر ..
-- اذكر 6 أسرار قد لا يكتشفها من يقابلك أول مرة ؟
للاسف انا عاملة زي الكتاب المفتوح ، و حروفه سهلة القراءة ، معنديش اسرار يكتشفها من يقابلني اول مرة ، غير اني طيبة و عبيطة و بصدق كل اللي بيتقاللي زي مادايما بيقولولي ..
بحب ربنا اوي ..
بس بتخنق اوي لما حد يتجاب في سيرته و ما اقدرش ارد غيبته ، لاني بخاف ازعل اللي قدامي او المح له انه غلطان ..

***************

ثانياً : تاج شيماء مهدي ..
التاج ده كان حكاية ، اتنين في واحد ، موضوعين منفصلين و تدبيسة واحده :))

الدبوس الاول :
1 .. بدأت تدون من امتي ؟ و دخلت العالم ده ازاي ؟
دخلت عالم التدوين في نص شهر اغسطس اللي فات ، الموضوع جه معايا من غير حساب ، يعني بكتب افكاري و خواطري و هواجسي – غريبة هواجسي دي :))- و بعدين حبايبي شاروا عليا اني اعمل مدونة وكده، فقلت ليه لأ ..

2 .. ايه كان انطباعك في البداية ؟
تجربة جديدة عليا تماما ، يعني حته ان حد يقرأ اللي بكتبه ده بالنسبة ليا زي اللي بيتفرج على كل كياني و اسراري .و بعدين بهرني اوي الناس اللي بتتكلم في كل حاجة و اي حاجة و بتعبيرات في منتهى خفة الدم ..
3 .. مين أكتر واحد بتهتم بتعليقه علي بوستك الجديد ؟
جوزي طبعا ، لازم اخد منه ختم "مصرح للنشر " :) ، بقتنع برأيه جدا ، و عشان كده بيشوف كل بوستاتي قبل ما حتى انشرها ، اما بالنسبة للتعليقات اللي بتجيني على المدونة كل الناس بهتم بيهم ، لانهم كلهم اصحابي و حبايبي ..
4 ..مين اتعرفت عليه من خلال المدونة و نفسك تتعرف عليه في الحقيقة ؟
اللي نفسي اتعرف عليهم من المدونين كتير اوي سواء من الجنسين ، بس الاكتر الاكتر اوي يعني :) حبيبتي محاسن صابر صاحبة مدونة عاوزة اتطلق و ،وامي الجميلة ماما امولة صاحبة مدونة الزمن الجميل ،و الرقيقة شيماء مهدي صاحبة مدونة حنين و احمد.
5 ..ايه أهم حاجة اتعلمتها من عالم التدوين ؟
لازم كل حاجه تكتب بصدق ، مش مهم اللغة تكون صح اوي ، المهم انها تكون من القلب عشان توصل ..
6 ..ايه أكتر حاجة كرهتها ؟
التعليقات ذات الملامح المبرحة و الالفاظ الخارجة ، و ايلام الغير بمجرد حروف مكتوبه .
7 ..ممكن تدي مثال عن اللي بتحلم تلاقيه ؟
لو في مجال التدوين .. نفسي يكون للمدونين كلمة في البلد ، بس كلمة بجد ، يعني ممكن يعملوا حاجة كده زي نقابة ، و يكون من اعمالها المشاريع الخيرية و التغير في البلد ، و مساعدة المدونين الافذاذ في نشر مدوناتهم و تعريفهم على العالم الخارجي بره حدود مصر، و انا شوفت نواة ده في الخير اللي بيعملوه المدونين المصريين ..
8 .. حاسس ان التدوين له تأثير ؟
طبعا ، كفاية على اقل تقدير ، انه بيخرج الواحد من عالمه المغلق عليه لعالم تاني و ثقافات اشخاص اخرين ، و افكار ، التدوين ده دنيا تانية ..
9 .. طيب كلمة أخيرة ؟
بشكر غاليتي ضي القمر و كل اللي وقفوا معايا و شجعوني على التدوين اصلا من البداية ، و اول ناس علقت ليا في اول بوستاتي ، لاني كنت مستغربة الموضوع في الاول ، و كلامهم ثبتني ..

الدبوس التاني :
1 .. أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟
- كان نفسي اكون طبيبة ، بس ده اتغير لما دخلت كلية الهندسة و حبيت كليتي و دراستي فعلا ..
- كان نفسي اختلط بالدنيا من زمان ، و احتك بيها و اتودك زي ما بيقولوا ، و اتثقف و اقرأ و يكون ليا نشاط اجتماعي، بس انا مؤمنة جدا بان كل شيء بأوان ، و لما ربنا قدرلي اني اخرج للدنيا و احتك بالناس حولي، كنت تماما في الحال اللي اتجاوب مع الدنيا و مش اتصبغ بألوانها .

2 ..أذكر 5 أحلام على الأقل تخص مستقبلك ؟
- نفسي اخلف كتير، و اساهم في الازمة السكانية في مصر :) ، بس كله بأمر الله ..
- نفسي اروح الريف الايطالي ، و اسافر اتعلم الطبخ هناك ، و اعمل كده زي الشيف "تايلر" – شيف بس من الاخر كنت بتابع حلقاته على قناة فتافيت بتاعت الطبيخ – بس هسيب جوزي و ابني و اروح فين ، اديني قاعدة ..
- نفسي اربي ابني زي ما حماتي ربت جوزي ، و احبه زي ما هيه بتحب جوزي – ربنا يخلليهالنا و يبارك فيها و يطول لنا في عمرها و يمتعها بصحتها ... آمين
- نفسي اقرب من ربنا اوي ، واعرف انه راضي عني سبحانه .
- نفسي ربي ينعم علي بنعمة حفظ كتابه ..

3 .. أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟
- صديقي و حبيبي و زوجي الغالي.
- "نانو" اختي الصغيرة ، و برضة كانت تفضل صغيرة عشان احس دايما انها بنتي اللي مخلفتهاش.

4 ..أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟
ابني الكبير و اول فرحتي عبد الرحمن – الله يرحمه و يجمعني به يوم الدين – بس هذا قضاء الله ورحمته ، انا عارفه انه تعب كتير و شاف في مرضه الكتير – مات و عمره اربع سنوات من سرطان في المخ في شهر ابريل 2008 – و انا بس زعلانه على الفراق و حضني اللي خلي منه ومش اكتر..

لمن تهدي هذا التاج ؟
اهدي التاج لناس كتييير اوي ..
ابي الفاضل ابو خالد صاحب مدونة ذكريات ابو خالد
امي الجميلة ماما امولة صاحبة مدونة الزمن الجميل
اختي الفاضلة موناليزا صاحبة مدونة امة الله
اختي الغالية فاتيما صاحبة مدونة روح قلب ماما
خالو احمد الصباغ
اخي الفاضل محمود العدل صاحب مدونة عالم محمود العدل
اخي المجنون صاحب مدونة المجنون
سوووو صاحب مدونة عجوووز و عندي 30 سنة


***************

بما اني خلصت الواجب قولت اقوللكم شوية من اخر اخباري ..

ياسادة يا كرام الحمد لله روحت بفضل الله عملت عمرة ، الموضوع بالظبط اخد مني 20 ساعة ، طيران من الرياض لجده ، و بعدين نزلنا مكة اعتمرنا- الحمد لله - و بعدين روحنا على طول ، ربنا يتقبل منى و من الجميع ، و دعيت للكل ربنا يستجيب مني ، ربنا ينولها لاللي نفسه يزور بيته الكريم .
عشان كده اتأخرت في ردي على بعض تعليقات البوست اللي فات ..


الخبر التاني ..
انشاء الله ، هعيد في مصر :) هيييييييييييه .
هنزل مصر على يوم 25 رمضان ، و اللي عاوز حاجة من هنا عنيا الجوز ، حبيايبي و اخواتي ..

كل سنة و انتو طيبين و ربنا يتقبل منكو رمضان و عملكم الصالح فيه ، و يبلغكم العيد و تكونوا من الفايزين فيه برضا الله سبحانه و تعالى ..

حالة وجود .....

اشعة شمس متلألاة في نهار احدى ايام شهر مارس ..
كرة الثلج المتدحرجة على جبل من الجليد ..
خيوط فضية رسمت في السماء في ليالي القمر المكتمل ..
ما يخلفه بداخلك ايس كريم المانجو و رمال الشاطئ و مياة البحر مدغدغة اقدامك برقة ..
رفرفات الفراشة عند مصباح منير ..
نسمات هواء متلاحقة تدفع بشراع احدي فلوكات النيل ..
زمجرة اطارات السيارات على الطريق في ليالي السباقات المرحة ..
زخات العطر المتناثر في الهواء ..
هواء ساخن في البالون ..
رقصات متعالية و اقدام تكاد تلامس الارض في خفة ..
ضوء منير في نفق مظلم طويل قاتم ..
شمعة برائحة الفواكة تنير و تمطرنا بعبير الفواكة ..
ورود حاكت فستانا لاجمل الاميرات ..
مخفوق الفراولة اللذيذة ..
السمكات الفضية المتألقة في القصص المصورة ..
فقاقيع الصابون التي تتناثر في الهواء ..
لسعة معجون الاسنان ذو النعناع الحار في اللسان ..
ماء بارد يطفىء الظمأ ..
طقطقة اصابع الايدي المتشابكة ..
بل الحوريات ذات الضفائر الطويلة التي تلمس اقدامهن ، ويحملن في ايديهن زنبق الماء كما في الروايات الاسطورية ..
و اخيرا احدى اميرات افلام الرسوم المتحركة ..



مجرد وجودي بجانبك يبقي تلك الاحاسيس بداخلي ..
انفاسك نبض حياتي ..
احتاج دوما لسماع " امي " من شفاهك ..
احتاجك لأعيش ...

اللهم تقبل مني ...

اليوم انقضت العشرة الايام الاوائل من شهر رمضان ، الشهر الذي يستهل بالرحمة و يتوسطه مغفرة و يختم بعتق من النار ...
تُرى ماذا قدمت من طاعة لله تعالي تؤهلك لان تكون من المرحومين في العشرة ايام الاولي ؟؟!!!
تُرى هل اهلت نفسك و جدولت وقتك لنول مغفرة الله تعالي في العشرة ايام المقبلة ؟؟!!

لا تيأس ،فإن باب التوبة و الرحمة دائما مفتوح، و ربنا سبحانه و تعالى اقرب لعبده و افرح بتوبته اكتر من العبد نفسه ، ان الله قريب لطيف مجيب سميع الدعاء ، و انه لغفور رحيم ..
أدعو الله لكل لمسلمين بالرحمة و المغفرة.
اللهم اعننا على طاعتك ..
اللهم حببنا في طاعتك ..
اللهم اجعل قرة اعيننا في طاعتك ..
اللهم اجعل ملاذنا في طاعتك ..
اللهم تقبل منا طاعتك ..
آمين ..

*************************

اجمل احساس يراودني عندما اسجد لله تعالى ، اضع انفي ارضا و اتذلل لله تعالى ، استحضر وجوده سبحانه و تعالى ، و اهمس بدعائي بعين باكية ، اعلم انه يسمعني و اتيقن بانه يحس بكل ما يدور في خلدي، اسجد له طاعة وحب ، اسجد له طلبا في حبه ، اتمنى ان يحبني ، و يرضى عني ، اتمنى ان انال عفوه ، اتمنى ان انال رضاه ، اتمنى ان انال حبه..
يتكئ جبيني على الارض في خشوع و كل جوارحي ساكنه تستحضر عظمة ملك الملوك ، انطق بكلمات تسبيح اسمه ، فاستحضر عظمته و جبروته و قوته و رحمته و حبه لعباده التوابين ، استحضر فرحته تعالى بعودة عبده التائب الهارب المتبرئ من ذنوبه ، فلا منجى و لا ملجأ منه الا اليه تعالى ..

اللهم اقبلني من عبادك الطائعين ..
اللهم اغفرلي ذللاتي ..
اللهم ابدلني حياة تائبة نائبة اليك ..
اللهم اقبلني من المسلمين ..
آمين ...

جدول رمضاني شوية مزحوووم ....

مش عارفه ليه مش جايلي افكار و دماغي فاضية ، و مشغولة برضه برمضان و اللي فيه ..
يمكن عشان رمضان شاغللي كل وقتي يعني من اول الشهر و انا بتمنى من كل قلبي ان ربي يتقبل مني صومي و طاعتي له و كل المسلمين اجمعين .
و لا عشان جعانة في النهار و بطني مليانة على الاخر في الليل و دول حالتين ماقدرش فيهم اني افكر ، و اعصر مخي و انزل منه موضوع يستاهل انه يتحط كبوست ، بس و ايه يعني ما هو البلوج غير مكان اقول فيه اللي بيدور في دماغي ، بدون اي تردد ...
و لا عشان المأدبة الرمضانية و الفطار اللي بعمله يوماتي على سنجة عشرة ، بجد مش غرور و الله ، اصل جوزي ظابطني – شوفتوا الرجالة - لازم سفرة كاملة من مجاميعه .
الاول كوباية الخشاف بالقراصيا و التين و المشمش و الفواكة المجففه ، طبعا انا مش بقول المقادير بس ده غصب عني
ما هو اللي دخل على صفحة "الوضع الكامل الخاص بي" و شاف اهتماماتي هيعرف ان عشقي الاول و قبل الاخير –اصلي سايبة المكانة الاخيرة دي لشوية حاجات كتير قوي – للمطبخ و اللي فيه و اللي بيعزه فطبعا ده بالنسبة ليا يعتبر موسم .
المهم من اول الخشاف ، و بعدين السمبوسة و لازم الشوربة يوماتي ، و بعد كد ه نخش في التقيل من سلطات و مقبلات و اطباق رئيسية ، و لازم المشروبات ودي بتيجي حسب الظروف .
احيانا نديها عصاير او مشروبات رمضانية زي العرق سوس و لا التمر هندي ، مفيش هنا خروب زي بتاعك يا مصر ، بيسموه ايه ؟؟... بيسموه ايه ؟؟ ... آآه جُلاب.
او اي مشروبات روحية قصدي غازية- يا عاااالم احنا في رمضان .... – بس بصراحة بسميها روحية اصلها بترد روحي فيا ، و هيه بتبقلل في بؤيي و تنزل تطفي الحرايق اللي عاملها الاكل ..
المهم كده كفايةبطني ورمت من الحشر قصدي الاكل ..
حتى ما بقدرش انزل صلاة التراويح في المسجد ، الواد ابني لسه صغير ، ولو راح الجامع معايا لا مني هصلي، و لا الستات اللي في الجامع هيعرفوا ، فبكنتفي بالصلاة في البيت ، و ربنا يتقبل منا و منكم ...
و بعد صلاة التراويح ييجي الحلو بأه ...
فطبعا بعد كل ده بنام قتيله لغاية ميعاد حلقة الاستاذ عمرو خالد ، و بعدها بقوم بأه اظبط البيت ، و بعد كده الواحد يشوف دينه بأه في الشهر الفضيل ..
و بعدين نحضر السحور ، و بنام بعدد الفجر ، و يومي كده دواليك طول رمضان ...
و يااا سلااااام لو عندي عزومة ، ما هو كل اصحابي على عيني و راسي ، بس بيتزحم الجدول لو بنزل اشتري طلبات للبيت و الطبيخ بأه ، بصراحة بحرص على موضوع العزايم دي ، يعني حاجه تخفف عن الواحد بعده عن اهله و بالزات ساعة الفطار ، يعني لمة الاصحاب على سفرة واحده و دعاء واحد ، بصراحة بتفرق قوي ..

الوقت الوحيد اللي بقدر ااقعده على اللاب توب و ادخل فيه عالم المدونات بيكون من 10 صباحا لغاية 1 ظهرا ، بصراحة بشوف اصحابي عاملين ايه و كاتبين ايه و اكتب في تعليقاتهم ، و كده يوماتي ..

عشان كده بعتذر لضي القمر صاحبة مدونة (حروفي ) ،و لشيماء مهدي صاحبة مدونة (حنين و احمد ) اني ما رديتش لسه على التيجان بتوعهم :(
بس يا جماعه الموضوع عاوز تفكير في الاجابات ، و الواحد مخه طخن من الاكل ، قال على راي المثل شبعة من بعد جوعه .......

و كله كوم و طارق عميرة صاحب مدونة ( كوارث) ، كنت بدخل التعليقات عندي في امانة الله ، الاقيه يقوللي انه بيدخل المدونة و البوست بتاعي الاخراني بقاله 4 ايام و ما نزلتش حاجه جديدة ..
و انا من هذا المزنأ بقول .......
-- يا كوارث اللي ايده يا خويا في المية مش زي اللي ايده في النار :)

كل سنه و انتو طيبين يا جماعة و رمضان كريم ، و انا بدعيلكم بظهر الغيب على طول ربنا يتقبل منا جميعا، فعاوزين ندعي لبعض يا جماعة و يا رب ربنا يتقبل مننا كلنا ..

الصيام جُنًة

عن أبي هريرة رضي الله عنه قال : قال رسول الله صلى الله عليه و سلم " قال الله عز و جل : كل عمل ابن آدم له إلا الصيام , فإنه لي و أنا أجزي به . و الصيام جنة فإذاكان يوم صوم أحدكم فلا يرفث و لا يصخب , فإن سابه أحد أو قاتله فليقل إني صائم . و الذي نفس محمد بيده لخلوف فم الصائم أطيب عند الله من ريح المسك .للصائم فرحتان يفرحمها : إذا أفطر فرح بفطره , و إذا لقي ربَّه فرح بصومه ." متفق عليه و هذا لفظ رواية البخاري وفي رواية له: ((يترك طعامه وشرابه ، وشهوته، من أجلي، الصيام لي وأنا أجزي به، والحسنة بعشر أمثالها )).

استوقفني هذا الحديث كثيرا، لطالما ترك بي اثرا عميقا ، فلقد شمل بطياته ، تعاليم واداب و احكام الصيام .
اعزائي ... الصيام هو العبادة الوحيدة التي تكون بين العبد و ربه فقط و ليس للمحيط البشري صلة بها ، لما تتطلبه من وجود ضمير حي و نفس يقظة تراقب الله عز وجل ، تنأى بالعبد فينا عن مظاهر الرياء و ملامح النفاق ،و تسد عليه ايا من تلك الابواب ، فالصلاة و الزكاة و الحج ممكن ان يتداخل بها عنصر الاعتبارية لمن حولك بجانب تقديم اركان العبادة و الطاعة لله تعالى.
فالصيام " جُنًة " بمعنى انه درع واقي للانسان من الذللات ، و درئه عن فعل المعاصي و هفوات الشيطان .
و الصيام تجربة عملية تعليمة لاختبار و تهذيب النفس اولا ، تتطاول فيها الاعناق و الايادي لنول رضا الله عز وجل . ثم التعود على ذلك لما بعد رمضان ثانيا .
اعزائي اخوتي في الله ، بلغنا الله رضاه في هذا الشهر الكريم و جعلنا من عتقائه في شهر الخير و الرحمة ..
واخيرا ..!!! اسمحوا لي ان اسند تفسيرا مفصلا للحديث القدسي الموجود اعلى لعلكم تنهلون من فضله الكثير ، و كل عام و انتم بخير ...

(( وفي هذا الحديث فوائد :


إن الله _سبحانه وتعالى _ جعل الصوم له ، عمل ابن آدم الآخر _ أي غير الصوم _ لابن آدم ، يقول الله تعالى : (( كل عمل ابن آدم له إلا لاصيام فإنه لي )) .
والمعنى:
أن الصيام يختصه الله _ سبحانه وتعالى _ من بين سائر الأعمال ، لأنه _ أي الصيام_ أعظم العبادات إطلاقا ، فإنه سر بين الإنسان وربه، لأن الإنسان لا يعلم إذا كان صائما أو مفطرا ، هو مع الناس يذهب ويأتي ويدخل ويخرج ولا يعلم به، نيته باطنة ، فلذلك كان أعظم إخلاصا ، فاختصه الله من بين سائر الأعمال .
قال بعض العلماء :
ومعناه إذا كان الله سبحانه وتعالى يوم القيامة وكان على الإنسان مظالم للعباد ، فإنه يؤخذ من حسناته إلا الصيام ، فإنه لا يؤخذ منه شيء ، لأنه لله عز وجل وليس للإنسان ، وهذا معنى جديد ، أن الصيام يتوفر أجره لصاحبه ولا يؤخذ منه لمظالم الخلق شيئا .
ومنها:
أن عمل ابن آدم يزاد من حسنة إلى عشرة أمثالها ، إلا الصوم ، فإنه يعطى أجره بغير حساب ، يعني أنه يضاعف أضعافا كثيرة .
قال أهل العلم :
وذلك لأن الصوم اشتمل على أنواع الصبر الثلاثة ، ففيه صبر على طاعة الله ، وصبر عن معصية الله ، وصبر على أقدار الله .
أما الصبر على طاعة الله : فلأن الإنسان يحمل نفسه على الصيام مع كراهته له أحيانا ، يكرهه لمشقته ، لا لأن الله فرضه ، لو كره الإنسان الصوم لأن الله فرضه لحبط عمله ، لكنه كرهه لمشقته ، ولكنه مع ذلك يحمل نفسه عليه، فيصبر عن الطعام والشراب والنكاح لله عز وجل ، ولهذا قال الله تعالى في الحديث القدسي : (( يترك طعامه وشرابه وشهوته من أجلي )).
النوع الثاني من أنواع الصبر الصبر عن معصية الله :
وهذا حاصل للصائم ، فإنه يصبر نفسه عن معصية الله عز جل ، فيتجنب اللغو والرفث والزور وغير ذلك من محارم الله.
أما الثالث الصبر على أقدار الله :
وذلك أن الإنسان يصيبه في أيام الصوم _ لاسيما في أيام الصيف الأيام الحارة الطويلة _ من الكسل والملل والعطش ما يتألم ويتأذى به ولكنه صابر لأن ذلك في مرضاة الله فلما اشتمل على أنواع الصبر الثلاثة كان أجره بغير حساب ، قال الله تعالى : ( انما يوفى الصابرون أجرهم بغير حساب) الزمر 10 ))


المصدر شرح رياض الصالحين لابن العثيمين

وفاء سافرت يا نااااس ....

النهارده صاحبتي وفاء نزلت اجازة لمصر ، هترجع انشاء الله بعد العيد ، و لو انها هتسيبني رمضان بطوله ، لكن اللهم صبرني ..

البت دي فعلا اسم على مسمى ، و ده باختصار شديد ابسط وصف ليها، معظم اصحابي غالبا بيكونوا من سني او اصغر مني ، بحكم ايام الدراسة والجامعة ، و لما اشتغلت قابلت كتير ، فرشولي عشاني الارض حرير، بس بجد مالقيتش زي وفاء كصديقة.
واكمني و ش القفص، و اول العنقود ، ماكانش ليا اخت اكبر مني، و اكمن فوفه اكبر مني بسنتين ،حسستني بسؤالها الدايم عني انها اختي الكبيرة، حسيت زي ما تكون مسئولة عني، احساسي نحو شقيقاتي الصغريات كنت بشوفه من منطلق الاخت الكبيرة ،اما احساس اني صغيرة , الا مع وفاء.
فوفة بالنسبالي المعني الحقيقي للصداقة ، ما افكرش اني احتجتها مرة , مسافة السكة و الاقيها عندي. من الاخر كده بحس انها مرايتي ، ننهجنا سوا يا بخت من بكاني و لا بكى الناس عليا , بصراحة بعتبرها ن الاشخاص الللي علموا في حياتي ..

تحياتي ليكي يا فوفة و اجازة سعيدة ، و ترجعلنا بالسلامة انت و الولاد ..

صندوق الدنيا ..

صندوق لافف على الحارات ، بيضم كل الولاد ، كلهم قاعدين و مبحلقين في عدساته ، شبابيكه فاتحة على الدنيا الف باب، و عم ايوب بيلف عجلة الصندوق ، بيحكي الحكاية كل مرة بنفس الهمة .....
عَجَل عَجَل عَجَل ...
عمال يلف و يدور ، ومتزوق بشريط بلاستيك ملون، يبهر العيون، ولاد كتير متجمعين و اللي يقدر يأجر يجي و يتفضل .
عم عبده العجلاتي عامل شغل على مية بيضا،، مزوق العجلة من دول عشان تشد الزبون ، و العيل يا ولداه يطب ما يقدرش يقاوم ،و يجري على ابوه عاوز ايجار العجلة.
و اتفرج يا سلام ..!!!
تليفزيون داير و مابيلقطش غير المزازيك و حكاوي ماليهاش طعم , بس المهم تسد الجوع و لا تشبعش ..
و اتفرج يا سلام ..!!!
باب متوارب وراه ابلتي فايزة و ابلتي امال ، معاهم سبرتاية و فناجان فاضي و بن محوج من مطحنة عم طاهر ، و حكاوي ما بتنتهيش عن فلانة و علانة و الحاجات و سعرها . فنجان يتملي و يرجع يفضى ..و الحكاوي مابتنتهيش .
و اتفرج يا سلام ..!!!
ترررريم تررريم ..
شفا و خمير يا عرقسوس ...
صاجاتة ترررررررررن , و عرقسوسه الساقع ابو تلجاية. الله عليه يروي بصحيح في الحر ده ، و يهدي صدر العيال بعد الجرى و التنطيط ، يشطف الكباية ،و ينطر مية الشطف على الارض ترطبها ، لاجل ينوبها من الطراوة جانب ..
لكن مفيش غير نقط عرقه نازلة على جبينه ، و عروق رقابته منطورين من المنادية .
شفا و خمير يا عرق سوس ..
و اتفرج يا سلام ..!!!
وفوق وقفت "هنا" ، عروسة جديدة بتنشر غسيلها الفوللالي ، فراحانة بنظافته و بتوفيرها ، ماهي غسلت بالتُمن كيلو .. على الله المهية تكفيها مسحوق غسيل بس ..
و اتفرج يا سلام ..!!!
وواقف ع الناصية شباب زي الورد ، ساندين ظهورهم على العمود , و غيتهم التقليب في الموبايل و الرنات للمطرب الفلاني و العلاني ، و اللي اتحرك فيهم جاب كورة و اداها لعب ..
و اتفرج يا سلام ..!!!
و فرارجي بيهش و ينش ، مستني اللي يطلب ، بدارى و عتاقي ، الحلو .. يا حلو ..
اصل الحلو للحلوين ...
و اتفرج يا سلام ..!!!
و عسكري في الاشارة ، ماسك قلم ودفتر ،و حافظ تمام القانون الجديد ، و بيورينا شطارته في التسميع و التنفيذ .
و اتفرج يا سلام ..!!!

ولاد رايحين جاين، ملمومين على عم ايوب عاوزين يسمعو الحكاوي ، و يحطوا المعلوم في كوزه الصفيح .
و يقوم عم ايوب ،يلفح الصندوق على ظهره ، و يلف بيه الحواري ، و وتلف بيه الدنيا ..
و اتفرج يا سلام ع الدنيا و صندوق الدنيا ..!!!

اللهم أجيرنا من عذاب النار ...

ايه اللي حصل يا مصر ، الواحد بيشوف اللي بيحصل في البلد و بيقول اهي ازمة و يارب تعدي.. بصراحة بأه ماكانتش ناقصة حرايق و انهيارات ، بس اقول ايه لنا الله .
النهاردة وبالتحديد الساعة الخامسة مجلس الشورى هو كمان ماسلمش من الخراب اشتعلت النيران في الطابقين الثاني و الثالث المبنى قديم و مبنى اساسا من اسقف و ارضيات خشبية و حدث وادى ذلك الى حدوث عدة انهيارات به.
و للمعلومية ان المبنى ، عمره حوالي 90 سنه ، ، افتتح سنة 1924 ، و شهد اول برلمان مصري حديث بعد صدور دستور عام 1923 وعقدت بداخل المبنى الجلسة الأولى لمجلسي الشيوخ والنواب في يوم السبت 15 مارس عام 1924. و يحتفظ المبنى و بالتحديد الطابقين الثاني و الثالث على اهم الوثائق التشريعيةو التاريخية المصرية.المبنى يا جماعة لوحده ثروة ويعتبر احدى الشواهد على المعمار في مصر الحديثة في اوائل القرن العشرين ، و مش بس كده كفاية انه شهد ايام من اهم الايام المصيرية في تاريخ مصر المعاصر.
بعد كل ده ، يوم لما يجي اخره, يجي على يد المتهم الاكثر شيوعا في مسلسل الحرائق المصرية، اللي يقضي عليه ماس كهربائي ..!!!
هو فيه ايه ؟؟!!!!! ....
ازاي مايكونش في المبنى نظام مضاد للحرائق ، امال فين قانون المرور و طفايات الحريق ، و الدوشة اللي خوتوا دماغنا بيها ، دي البيوت فيها طفايات حريق ..
ماعنديش خاتمة للمأساة دي خلاف ..
حسبي الله و نعم الوكيل , و انا لله و انا اليه راجعون.و بنا يسلم المصابين و يرجعهم بالسلامة لذويهم.
سلااااااااااااااام وربنا يستر ....

بيجامتي البرتقالي ...

- "مساء الورد يا ماما ، بتعملي ايه بأه الليلة دي ؟"
رددت هذه الكلمات على مسامع امي و انا اطبع على جبينها و يديها قبلاتي عندما زرتها في بيتنا كنا مساء احد الايام عند اقتراب دخول الشتاء. كانت عادة امي في تلك الايام ان تبدل الملابس الصيفية بالشتوية و كان مجهود عليها ان تقوم بذلك .
فبادرتها قائلة ..
- "خلليكي انت مرتاحة يا ست الكل قولي بس انت تأمري بإيه و انا اعمل اللي انت عاوزاه" .
هممت بالعمل الملابس ، كانت ثقيله جدا و غامقة الالوان، مخلوطة برائحة الصابون الذي تتعمد امي وضعه بداخلها لتكتسب رائحة زكية اثناء التخزين.
تذكرت الشتاء و لياليه البارده، و التحافنا بالبطاطين و كباية السحلب مع شوية فول سوداني و دفاية.
ياااا سلاااااااااام....
هكذا يكون الدفء ، و الادفئ من ذلك الحديث العائلي اللطيف و الضحكات المدوية في ارجاء المنزل.
وظللت افرغ الخزائن من ملابس و بطاطين، الى ان لاحت لي قطعة لونها برتقالي، كانت غير مألوفة وسط الحشد من الالوان الغامقة، استوقفتي للحظة و كأنها اشارة حمراء، استرجعت بذهني : ما هذا يا ترى؟ آه انها بجامتي البرتقالية ، ياه التقطها بيدي و تحسستها، و كانما اشعر بنسيجيها يلف جسمى و يغمرني بدفئه .
ياااه مازالت في الخزانه بعد هذه السنوات الطويله ، لماذا لم تتخلص منها امى الى الان ، لم ارتديها منذ عشر سنوات تقريا، ربما حافظت امي على طلبي بألا تلقيها ...
وضعتها في حقيبتي جانبا حتى انتهى مما بدأت به، رتبت الخزائن ووضعت بها قطع الصابون كما اوصتني امي.

توجهت لبيتي فأنا متزوجة و لدي طفلين ، و كلها ساعتين و يحضر زوجي من عمله، و لازم اكون في البيت قبل ان يصل احضر له العشاء و افتح له الباب عندما يصل ،هذا هو تقليدنا سويا عندما يصل للمنزل منذ ان ارتبطنا.
بعد ان هدأ البيت و لا يسمع سوى صوت السكون، اجول بنظري في سقف حجرتي، استرجع احداث اليوم انتظارا للنوم .
فجأة تذكرت البيجامة.. مازالت في حقيبتي، لماذا احضرتها؟!! لألبسها ؟!! لا طبعا ، ليست على قياسي، لا اعلم.
فقمت من مكاني ، و اغلقت باب غرفتي، حتى لا يستيقظ زوجي من منامه فهو مرهق و يحتاج للراحه.
اخرجتها من الكيس ، لمع في عيني لونها الزاهي ، لطالما ناسبني هذا اللون كله اشراق وحيوية و دفئ.
كنت في الخامسة عشر و رأيت "توتا" ابنه خالتي ترتدي مثلها ، اعجبني بشده بساطة شكلها و حبات الفراوله التي رسمت على صدرها و ازرارها التي كانت على شكل فراشات ملونه .

- "شوفتي البيجامة دي من واحده عدت علينا في الشغل النهارده ، معاها حاجات حلوة اوي ، لاقيت البجامة رقيقة و سعرها مناسب اخدتها ، ايه رأيك !!.
هكذا سمعت خالتي تخاطب امي .
-"مبروك يا توتا تعيشي و تدوبي".
كان هذا رد امي ممزوجا بابتسامة صافية.
-"يا سلام لو الست دي تيجي عند ماما في الشغل ، بس مين عارف".
جال ذلك في خاطري.
و بعد يومين اهدتني خالتي بيجانة مماثلة و كأنها سمعت بحديث نفسي ، فرحت بها كثيرا ،و لبستها و اطلقت شعري المقصوص كاريه على كتفي، كان شكلي فيها تحفة لها ضي حيوي على وجهي، توردرت وجنتاي كحبات الفراولة المتراصة على صدر بيجامتي، ابتسمت في المرآه و كنت زي ما بيقولوا كتكوتة . ما احلاني ...

وفجأة طرأت لي فكرة مجنونة، اغلقت الباب و تناولت بجامتي، واجهت صعوبة في ارتدائها نظرا للزياده بعد الجواز و تغير جسمي بعد الولادة ، فككت شعري من الكحكة ،و اطلقته على كتفي مثلما فعلت انفاً ، تذكرت مشاعر البنوتة الصغيرة، حيوية و شباب ، روح متراقصة كالفراشة ، ضحكات عالية ، الوان فاتحة و صارخة رائحة البحر و عبير الفواكة، شقاوة ، حكاوي البنات ، الوان الماكياجات و مونيكير، احلام المستقبل ...
ابتسمت بسعاده بالغة، سافرت للماضي كالافلام ،تنقلت بين كل ما هو سعيد فيما مضى، لكنني هنا الان اعيش باحساسات تغمر حياتي بالرضا و السعاده ، ضحكات زوجي و اولادي تملأ ارجاء حياتي و كياني.
خلعتها عني و صفدتها ،و اعدتها الي الخزانة مع قطعة من الصابون شاكرة لها ذكرياتي الجميلة.
ذهبت الي سريري و ارحت ظهري، آه لقد نسيت لم شعري لكن مش مهم سأحرره مثلما كنت انام و انا صغيرة ،استدرت و لففت زوجي بذراعي و ذهبت في نوم عميق ....

سكوووووت .... بصووررررر ....

كان نفسي اكتب من زمان، لكن كان فيه ظروف كتير منعاني ،اهمها اني كنت بخاف اكتب اصلا ، و اطلع اللي جوايا على ورق و اديه لحد يقراه ، كنت متصورة ان ده نوع من اطلاع الغير على احساساتي ،او يعني انحرج لو للي بيقرأ كلامي يستتفهه ، او يستقل بيه ، او انه يوجه ليا نقد احس فيه اني صغيرة ادام نفسي، بالرغم اني بأرحب بالنقد جدا، لكن اهوه كنت بتكسف ..
طبعا كان كمان فيه ظروف حياتية منعاني، لكن الحمد لله فضيت شوية وعندي حالة من الفراغ ، ففكرت في المدونة .
سميتها تصويرة !! ..
كل حاجة في الدنيا عبارة عن صورة بتحكي ببلاغة و من غير صوت عن حالة بنعيشها ..
عايزة كل اللي بيقرأ صوري ، يشوفها زي ما انا عاوزة اعرضها ..
اتمنى ان تصاويري تقدر تنقل احساسي ، و الاقي فيها الصديق اللي يعرف بجد يسمعني ....