جدول رمضاني شوية مزحوووم ....

مش عارفه ليه مش جايلي افكار و دماغي فاضية ، و مشغولة برضه برمضان و اللي فيه ..
يمكن عشان رمضان شاغللي كل وقتي يعني من اول الشهر و انا بتمنى من كل قلبي ان ربي يتقبل مني صومي و طاعتي له و كل المسلمين اجمعين .
و لا عشان جعانة في النهار و بطني مليانة على الاخر في الليل و دول حالتين ماقدرش فيهم اني افكر ، و اعصر مخي و انزل منه موضوع يستاهل انه يتحط كبوست ، بس و ايه يعني ما هو البلوج غير مكان اقول فيه اللي بيدور في دماغي ، بدون اي تردد ...
و لا عشان المأدبة الرمضانية و الفطار اللي بعمله يوماتي على سنجة عشرة ، بجد مش غرور و الله ، اصل جوزي ظابطني – شوفتوا الرجالة - لازم سفرة كاملة من مجاميعه .
الاول كوباية الخشاف بالقراصيا و التين و المشمش و الفواكة المجففه ، طبعا انا مش بقول المقادير بس ده غصب عني
ما هو اللي دخل على صفحة "الوضع الكامل الخاص بي" و شاف اهتماماتي هيعرف ان عشقي الاول و قبل الاخير –اصلي سايبة المكانة الاخيرة دي لشوية حاجات كتير قوي – للمطبخ و اللي فيه و اللي بيعزه فطبعا ده بالنسبة ليا يعتبر موسم .
المهم من اول الخشاف ، و بعدين السمبوسة و لازم الشوربة يوماتي ، و بعد كد ه نخش في التقيل من سلطات و مقبلات و اطباق رئيسية ، و لازم المشروبات ودي بتيجي حسب الظروف .
احيانا نديها عصاير او مشروبات رمضانية زي العرق سوس و لا التمر هندي ، مفيش هنا خروب زي بتاعك يا مصر ، بيسموه ايه ؟؟... بيسموه ايه ؟؟ ... آآه جُلاب.
او اي مشروبات روحية قصدي غازية- يا عاااالم احنا في رمضان .... – بس بصراحة بسميها روحية اصلها بترد روحي فيا ، و هيه بتبقلل في بؤيي و تنزل تطفي الحرايق اللي عاملها الاكل ..
المهم كده كفايةبطني ورمت من الحشر قصدي الاكل ..
حتى ما بقدرش انزل صلاة التراويح في المسجد ، الواد ابني لسه صغير ، ولو راح الجامع معايا لا مني هصلي، و لا الستات اللي في الجامع هيعرفوا ، فبكنتفي بالصلاة في البيت ، و ربنا يتقبل منا و منكم ...
و بعد صلاة التراويح ييجي الحلو بأه ...
فطبعا بعد كل ده بنام قتيله لغاية ميعاد حلقة الاستاذ عمرو خالد ، و بعدها بقوم بأه اظبط البيت ، و بعد كده الواحد يشوف دينه بأه في الشهر الفضيل ..
و بعدين نحضر السحور ، و بنام بعدد الفجر ، و يومي كده دواليك طول رمضان ...
و يااا سلااااام لو عندي عزومة ، ما هو كل اصحابي على عيني و راسي ، بس بيتزحم الجدول لو بنزل اشتري طلبات للبيت و الطبيخ بأه ، بصراحة بحرص على موضوع العزايم دي ، يعني حاجه تخفف عن الواحد بعده عن اهله و بالزات ساعة الفطار ، يعني لمة الاصحاب على سفرة واحده و دعاء واحد ، بصراحة بتفرق قوي ..

الوقت الوحيد اللي بقدر ااقعده على اللاب توب و ادخل فيه عالم المدونات بيكون من 10 صباحا لغاية 1 ظهرا ، بصراحة بشوف اصحابي عاملين ايه و كاتبين ايه و اكتب في تعليقاتهم ، و كده يوماتي ..

عشان كده بعتذر لضي القمر صاحبة مدونة (حروفي ) ،و لشيماء مهدي صاحبة مدونة (حنين و احمد ) اني ما رديتش لسه على التيجان بتوعهم :(
بس يا جماعه الموضوع عاوز تفكير في الاجابات ، و الواحد مخه طخن من الاكل ، قال على راي المثل شبعة من بعد جوعه .......

و كله كوم و طارق عميرة صاحب مدونة ( كوارث) ، كنت بدخل التعليقات عندي في امانة الله ، الاقيه يقوللي انه بيدخل المدونة و البوست بتاعي الاخراني بقاله 4 ايام و ما نزلتش حاجه جديدة ..
و انا من هذا المزنأ بقول .......
-- يا كوارث اللي ايده يا خويا في المية مش زي اللي ايده في النار :)

كل سنه و انتو طيبين يا جماعة و رمضان كريم ، و انا بدعيلكم بظهر الغيب على طول ربنا يتقبل منا جميعا، فعاوزين ندعي لبعض يا جماعة و يا رب ربنا يتقبل مننا كلنا ..